ليلى والذئب بالاردني

قصة ليلى والذئب

كانت ليلى بتتبرطع مع الغنم ورا الدار لمّا سمعت أمها في الحوش بتنادي عليها: "ليلاااا! تعي جاي!"

أجت ليلى وقالت ليها: "شو بدّك يمّا؟"

قالت أمها: "خذي هاللّبنات وديهن لجدّتك تمرسهن عشان بدنا نطبخ منسف ُبكرّى"

ردّت ليلى: "حاظر يمّا".

أخذت ليلى اللّبنات بالسّلة وبدت تمشي وهيّه تهيجن, ومافي شوي ولا ّ ليلى بتسمع صوت بقول ألها: "قوك ياخيّة!"

اتطلّعت وقالت: "قويت, بس منو إنت؟"

قال ألها: "أنا, شو بدكي فيّي, وين موجها؟"

قالت ليه: "عند جدّتي"

فكّر شوي و قال ألها: "من هانا اقرب ألكي من الطريق تبعتك, شو رايكي تيجي من هانا معاي؟"

قالتله: " روح يا رجل فكني من شرك و امشي من قدامي احسن لأصمتك بزعموط اللبن أجيبك أرض"

قاللها: "يا بنت الأوادم, هاي الطريق بتوصّل اسرع لجدتك, ردي عليّ وخلينا نطيح من هان أقرب لينا"

قالتله: "اسمع ترى منا شايفه الظو , إقلب وجهك!"

ولمّا شاف الذئب انّو ليلى معيّه ترد عليه راح ركاض من طريق قريبة و سبق ليلى على بيت الجدّة.

وصل البيت ودفش الباب بإجره ودخل, قالت الجدّة (بخوف واستغراب): "منو هاظا؟!"

لـّفت وجهّا و لمّا شافت الذيب المنحوس, قالت أله: "البين يطسّك خرّعتني, وشّو اللّي جابك يا مسخّم؟"

قاللها : "مالك انطبزتي؟ هو انجّبي عاد واسكتي!" نط عليها ودملها بين اللّحف و حشاها بلخزانة!

لبس ثوب الجدّة ونام مطرحها.

وما شوي ولا ليلى بتدق الباب. وقال (بصوت الجدة): "افتح الباب وفوت!"

فتحت ليلى الباب و قالت: "هاذي أنا يا تيتا!"

قال : "اقربي جاي! أنا تلفانه, مني قادره أقوم!"

قرّبت ليلىِِ عند الجدّة و هي متعجبة وقالتها: "شايفيتك متغطيه! شو مال صوتك مبحوح؟"

قال بصوت الجدّة: "أيوا ياستي, امبارح نمت متكشفه!

قالت ليلى: "هاي فهمتها, بس لويه أذانكي كبار؟"

جاوب وقال: "عشان اسمعكي مليح"

قالت ليلى: "اه اه اه, طب و علام عيونكي, كبرانات؟"

قال: "عشان اشوفكي كويّس, مهو الكبر عبر يا تيتا"

قالت ليلى: "سالامتكي يا تيتا, بس ليش زقمك كبير هيه؟"

قال: "عشان ازلطك فيه!" ونط على ليلى وبدو يوكلها!!!

صرخت ليلى على طول صوتها:

"ويلييي, يا غبصة يا حزينة!!! ساعدوني ....!!!"

ولحسن حظ ليلى كان أبوها قريب في السيل بتصيّد, و لمّا سمع صراخها: "ساعدوني ساعدوني!" تناول القنوه و راح يحجل حجل و ركاظ على بيت الجدّة!

شاف الذئب ناط على ليلى بدو يوكلها, هو شاف هيك طار ظبان عقله, ومسكه ونزل على دماغه بالقنوه لما فرط وراح مات فطيس.

بعدين راح ل ليلى وطلّعو الجدّة من الخزانة!

و ثاني يوم طبخوا مناسف و شرّبوا لبن و سمن و عاشوا مبسوطين.